خلينا نتفقو على حاجة…. ما حصل في 14 جانفي 2011 هو بالتأكيد حدث مهم ونوعي في تاريخ تونس أسبابه متقاطعة ومتشابكة فيها من العفوي المرتبط بأرضية ملائمة هيئتها بعض أخطاء النظام السابق وفيها من المبرمج هيأته عوامل خارجية وتحولات دولية واقليمية تم التخطيط لها…..
ولكن في مقابل ذلك وللمرة الألف اقول لبعض الأصدقاء وخاصة الجديين منهم راهو عيب تصدقو قصة كتاب هيلاري كلينتون متع شهرين لتالي او حاليا قصة بريدها الإلكتروني وايمايلاتها الي حكات على ما حصل نهار 14 جانفي 2011 في تونس….. راهو الحكاية ما فماش والبريد الإلكتروني ما زال ما تسيبش كيما طلب ترمب من وزير خارجيتو ان يفعل في إطار الحملة الانتخابية الرئاسية ضد المرشح الديمقراطي…
الحكاية وما فيها الوخيان في الإمارات وفي إطار عركتهم مع الوخيان في قطر بداو يملّسو في برقيات من روسهم ويحطو فيها كل ما يأكد ويبرر عركتهم مع قطر والإخوان المسلمين وفي الثنية متع التمليس هذا شوية شكر لشجاعة قياداتهم وقيادات المملكة السعودية إلى هيلاري كلينتون اقرت حسب التمليس هذا انو الوحيدين الي تصداو للسياسة الأمريكية في المنطقة هوما الإمارات والسعودية 😀 وحكات كيفاش وزير الخارجية السعودي المرحوم سعود الفيصل سكر في وجها التلفون وقاللها احترم روحك ما عندكش الحق تدخل فينا كي بعثنا قواتنا للبحرين قوات درع الجزيرة بش توقف الانتفاضة ضد النظام البحريني سنة 2011….
و هيلاري كلينتون حسب التمليس هذا قالت انو زوز وزراء خارجية وحيدين هنتلوني ووقفوني عند حدي هوما السعودي سعود الفيصل والاماراتي عبد الله بن زايد……
بالتالي يا جماعة يرحم والدين والديكم فكوا علينا وعليكم من حكايات ايميلات هيلاري كلينتون والاستشهاد بحكايات خيالية ما فماش منها…. وكان ما زلتو شادين صحيح في الحكاية هاذي، غدوة بقدرة ربي نهبطلكم الايميل عدد 3465 المؤرخ في 23 مارس 2011 بعثتو هيلاري كلينتون لجمال العتروس ربي يشفيه تهنى فيه على رئاسة النادي الافريقي وتعبرلو انها من أكثر المعجبين بالنادي الافريقي بعد فريقها الأول أولمبي شيكاغو وانها عمرها ما نسات انو في شبابها، النهار لول الي التقات فيه مع بيل صادف تمركية الهادي البياري للبونتو الخامس…..