ملاكم تونس ينافس بطل أمريكي .. حاملا العلمين التونسي والفرنسي .. كيف كانت ردة فعل المذيع ؟

عام 1989 كان عندنا ملاكم تونسي خشين ياسر اسمه توفيق البلبولي ولد سكرة وبتحديد شطرانة ، لعب بطولة عالم في الملاكمة WBA ضد واحد أمريكاني …
أيا فتكم بالحديث ، توفيق طلع في أول الثمانينات لفرنسا ، و خذا الجنسية الفرنساوية مع التونسية و هز بطولة فرنسا مرتين و نهار الكومبا على بطولة العالم ، طلع للرّينڤ بعلم تونس و علم فرنسا …
بدأت المباراة والأربعة الجولات الاولى عمك توفيق ياكل في الضرب و طاح مرة و حسبوله ….
و على طول ماهو خاسر ، و المعلق الفرنساوي يقول :
Le boxeur tunisien est en grande difficulté… Le boxeur tunisien est touché… Le boxeur tunisien aura du mal à finir les 12 rounds …
أيا يا سيدك ، تهب ريح النصر في الجولة الخامسة ، و توفيق يشد يمرمد الأماريكاني ، و يطيحو مرتين و في الجولة الثامنة يطيح الاماريكاني بالضربة القاضية و ما يقومش ، و توفيق يولي بطل العالم في الوزن الثقيل الخفيف بعد evander horifield يا بو ڤلب …
المعلق الفرنساوي هو بيدو ، ولا يعيّط :
Le boxeur français est champion du monde !!! Félicitations pour la France !! Quel moment d’émotion pour les français !! ….
والحديث قياس …وطابا طابا والعام الجاي تجينا صابة