أبرز ماجاء في مقترح حكومة المشيشي بخصوص ال Vignette في قانون المالية 2021

مقترح جديد من حكومة المشيشي بخصوص ال Vignette في قانون المالية 2021 نحاولو نفسروهولكم بالدارجة.
✳ المقترح:
الفصل 109 ثالثا: يستوجب خلاص معاليم الجولان بالنسبة إلى الأشخاص الطبيعيين والأشخاص المعنويين الخاضعين لواجب إيداع التصريح في الوجود، القيام بإيداع آخر تصريح مستوجب بعنوان الضريبة على الدخل أو الضريبة على الشركات.”
✳ التفسير:
بالنسبة ل vignette 2021 (وبش نركز على الأشخاص الطبيعيين مش الشركات) في العادة نهزو ال Carte Grise و الفلوس و نمشيو نخلصو.
حسب المقترح هذا، فما ورقة جديدة لازم نهزوها الي هي déclaration d’impôts (معروفة عند التوانسة ب “ورقة النظافة” “quittance d’impôts ” وهي نفس الورقة الي تخرجها كي بش تقيد كرهبة والا عقار باسمك)
✴كيفاش تخرج الورقة هاذي؟
ساهل برشي، تطلب مالمشغل متاعك يعطيك ورقة ال déclaration d’impôts و تهزها للقباضة يعطيوك مطبوعة تعمرها (معروفة عند التوانسة باسم الدوسي الأزرق) بعد تصبهم جميع في القباضة و يخرجولك ال Quittance.
⚠️ملاحظة 1: كي تخرج ال Quittance كان طلعت تسال الدولة فلوس يقولولك قداش و تنجم تستعملهم في خلاص أداءات العام الي بعدو (ماتاخوهمش فلوس) و كان الدولة تسالك يقولولك تعدى للكاسة خلص
⚠️ ملاحظة 2: ال Déclaration d’impôts متاع 2020 مثلا تنجم تعملها ابتداءا من مارس 2021 يعني لازم مراجعة التواريخ القصوى لخلاص ال Vignette مش نحصرو المواطن في 5 أيام و ننصبو العسة في الطريق بش نشبعوهم خطايا …
ان شاءالله نكونو بسطنا المعلومة كيما يلزم