للأسف ما زال بعضهم يصر على المغالطة ويصور الأمور خلاف الواقع.
بالبلدي وباختصار .. المشهد إنه رئيس دولة بيقول إنه السخرية من معتقدات الآخرين حق تكفله دولته، فالآخرين دول بيقولوا إن هم برضه حقهم يقاطعوا دولته لعلها تعلم ان السخرية والاستظراف أحيانا بتكون تطاول وقلة أدب!
هابسطها لآخر مرة .. الواد حمادة ابن عم عطية الجزار شتم أهل الحارة، وعم عطية حاول يشرح لهم بعصبية (او بكل هدوء) انه من حق حمادة يشتم زي ما هو عاوز وانه أصلا متعود يشتم أمه وإخواته. فأهل الحارة خدوا قرار مش هيشتروا لحمة من عنده تاني .. بسيطة؟!
واحد (الظاهر بيحب الهزار شوية) رد علي: حلوة قصة عم عطية الجزار بس لو كنت ذكرت فيها أن حمادة اتقتل كانت تبقى واقعية مش تدليس!!
يا حبيب قلبي أهل الحارة ايه علاقتهم بقتل حمادة؟؟ قالوا أكتر من مرة ان اللي قتله مش تبعهم وعمرهم ما زعلوا من عم عطية لما قتل القاتل. أو يمكن حضرتك تقصد ان الرئيس ماكرون بيقول للمسلمين: ما دام الطالب الشيشاني قتل المدرس، فاحنا بالعند فيكم هنفضل كدولة نرحب بالرسوم المسيئة لنبيكم عشان يفضل يطلع منكم متطرفين بيدبحوا ونكمل مع بعض حياتنا الجميلة بالطريقة دي؟؟ اسمح لي .. دا يبقى راجل تافه اوي!!