تونسي يروي قصة حبه الحزينة .. وينصح التوانسة ..” استحفظوا على اللي تحبوه راهو الدنيا غدارة و الندم بعد الموت عدم”

انا حكايتي خترت نحكيها من “faux profil” ما نعرش علاش يمكن خاطر ما نحب حد يعرفني و يحس بضعفي.. 💔
عسلامة
علاش قصيتوها ؟ مممم مقصيناهاش احنا.. يمكن هاكا اللي مصبرني
حكايتي هذي خممت برشا مرات قبل ما نكتبها.. يمكن خاطر حكاية سكرت عليها في قلبي عندي سنين..
اما ك قريت حكاياتكم ضحكتوني و شجعتوني..
باهي باش نكون واضح مالاول راهي مهاش قصة حب “سعيدة” و طويلة نوعا ما لذا بربي ارحمونا من ريق “شكون يلخصلي..”
نتفكرها كي تو في افريل 1995 (ديجا قريب من date ليوم.. ديجا لحكاية كتبتها ك نوع من التكريم..) لمهم وقتها راجعين من عطلة و انا وقتها 1ère année.. ههه ايجاو نحكيلكم على روحي وقتها:( عرفتوه كالفرخ المغط؟ هذاكا انا شخصيا ما نعرف كان الكتاب و الكراسة.. نخاف مالخلط plutôt نخاف برشا من بابا و نخاف لا نتبعهم و ترصيلي في عملة و يسمع السيد الوالد..) لمهم كيما قتلكم راجعين من عطلة.. دخلنا للكلاس بدا البروف يحكي و يدخل المدير.. و دخلت هي وراه
انا اللي كنت راسي ما نهزوش و امبوسيبل نركز في أي حاجة غير الكور.. طيحت الستيلو و قعدت سارح فيها ( نوصفهالكم : مزياااااانة، تي اكثر مالزين من غادي.. ❤️ عينين مارون، شعر ارطب قصير، خدود يعملو الكيف.. و شفايف يخلق الرحمان.. أما في البدن ما قال حد لحد ههه كانت حاجة مزيانة برشا برشا 😍..)
تكلم المدير : نحب نعرفكم زميلتكم الجديدة (X) نقلت من “هه لا علينا” نحبكم تحسبوها اختكم..
و خرج.. غزرلها البروف و قلها اقعد بنتي قدامي.. (حذايا يا جماعة حذايا 😍 و انا وين تلقاوني.. حتى مالسخانة طلعتلي..)
عديت ساعة كاملة نغزلها بالسرقة (هي سارحة و انا سارح فيها..💔)
وقتها الطفل البريئ اللي فيا بدا يتخيل في قصة الحب الي شنعيشها معاها كيفاش شنتعرفوا و نكملوا نقراو مبعضنا، نتخطبوا و نعرسوا.. ههه صدقوني خممت حتى زعما امها و بوها يحبوني و الا لا.. 😐
انا هككيكا باهت و هي تلفتتلي و حسب رايكم شقتلي..؟
-لاخي هالكلاس ديما كبي هكا الناس الكل مطبسة روسها تكتب و الا ليوم بركا..🤦‍♂️
انا وقتها حسيت سطل ماء بارد تصب عليا.. حسيت اللي احنا بعاد برشااا على بعضنا في طريقة التفكير و المخ..
هههه و هاكي كانت آخر مرة تقعد حذايا.. ليه ليه تعرفت على ولاد الكلاس ( تي قول الليسي الكل..) و انا نغزر من بعيد.. وتعدات الايام و الأعوام و انا ما نجمت نغزر لحتى وحدة أخرى رغملي اكثر من كلمة السلام متجيش بيناتنا..
و وصلنا للباك.. و حب ربي و نجحنا الزوز ( هه انا بمونصيون و هي برحمة ربي.. 😂). و جاء الصيف.. كان اخيب صيف عديتوا نتغبن كيفاش معاش شنراها.. المرة هاذي مش باش نرجع لليسي و في قرارة نفسي الحكاية وفات و الأمل لي هزيتوا معايا سنين ضاع..
(خوكم الصيف هاكا ربي هز عبد و حط عبد قلت شنبدا بداية جديدة و لزمني نزقلم اموري..)
تعدا كالصيف ليه ليه بين تفرهيد و خرجات و تحضير باش نمشي نقرأ في ولاية جديدة.. و في مخي تستنا فيا عيشة جديدة..
**************
تعدلت الايام و عندي كيما تو.. غدوا اول نهار في ال fac
قمت الصباح زقلمت اوموري و خرجت.. وصلت.. كيما الناس الكل باهت في الfac و كبرها و قداش فيها عباد و نلوج في binomi..(يذكروا بالخير..) على تلفيتي طلعواشكون ريت؟ اي اي ريتها هي (X) اول حب في حياتي الطفلة المزيانة لي عديت سنين نحب فيها من بعيد.. وقتها ما نعرش كيفاش حسيت و الله (فما غمة تنحات من قلبي و اللي كان سببها فكرة لي معاش شنراها، فرحة خاطر الأمل تجدد.. و في نفس الوقت نوع مالبرود خاطر ما تتلفتليش جملة ههه خاصة اني في هالصيف زادت زيانة بطريقة غريبة كبرت و تبدلت اما للأحسن و في كل شيء زادة. و زيد داخلة مع زوز ولاد.. شخلاني نقول في قرارة نفسي “بالاهي فاش تعمل ما تلفتتلكش في الليسي شتغزلك تو.. رغملي بالنسبة ليا كانت كي الشمس في حياتي غطات عليا لبنات الكل.. راني ما كنتش منجم نغزر لغيرها و اللي كان بالرسم مخوفني..)ههه كهو ما نطولش عليكم عادت حليمة لعادتها القديمة.. نشد تركينا و نغزلها من بعيد.. ههه شعندي نعمل كنت خايف لا نصدم و الله خايف..
فما نهار انا مروح.. و نرا فيها واقفة تحكي قدام لفوايي..
وقفت و قعدت نغزرلها تحكي هي و صاحبتها و تضحك تضحك (ههه عندها ضحكة تهبل تحسها فيها كمية اغراء كبيرة اما في نفس الوقت تحسها بريئة و ديما من قلبها..)هي كيكا و تلفتت طالعة في الدروج و تجي العين في العين
“اي اي تغزرلي والله غزرتلي.. وقفت شويا و تبسمت، اي اي تبسمت ليا انا و بالضبط كيما اول مرة ريتها طلعتلي السخانة اما لمرة هاذي تبسمت و زيد هزيت يدي و بيبيتلها.. هه و يا ليتني و الله
تعرفوا شعملت؟ دوحت راسها و دخلت و انا خوكم وين تلقاوني.. يا ليتني كنت ترابا و كهو 🙂
اما رغم هاكا و في اللحظة هاكي قررت نتشجع و غدوة نحكي معاها كهو يزي ما ضيعت سنين نغزر من بعيد.. ليلتها تعداتلي une nuit blanche ( انا شخصيا في حياتي الكل فما ليلتين لي تعداولي بالرسمي مغير نوم هاذي الأولى و الثانية هاي جاية اصبروا عليا شوية.. 💔)
هه كهو عديتها كل نخمم شبش نقولها و زعما اش باش تجاوبني..
جاء اليوم الموعود قمت الصباح داخل بعضي.. حضرت روحي و مشيت للفاك قيتها قاعدة هي و صحابها.. انا قدمت ماشيلها و هي عينيها تحلت و وجها تقلب انا جمدت في بلاصتي.. انا كيكا و نرى فيها قامت و هي تغزرلي.. تبعتها..
لين بعدنا شويا وقتها غزرتلي و اول مرة حكات معايا..
-لاخي كنت جاي تحكي معايا و الا انا نستخايل؟
– جاوبتها بكل ثيقة في النفس : Si si
ما راعني الا اطرشقت بالضحك و قاتلي( بالحرف) : bizarre تصورتك شتعدي بقية العام تغزرلي و برة.. كالعادة 😐
خوكم وين تلقاوني دخلت باعضي و بديت نمهمه حاولت نتكلم شيئ و روسكم يا رجال حتى من صوتي هرب و العرق لبني..
-محلاك
– ههه كيفاش؟
-محلااك برشا، نقصد ظاهرة، مازينك اااا نقصد ظاهرة طبيعتك باهية، تحب نحكيو؟ نقصد أصحاب عيشك ما تفهمنيش بالغالط… تعرشي كيفاش سامحني كان قلقتك..
– هههه يا ولدي اركز و خمم قبل ما تحكي، قلي شتحب؟
-نحب نحكي معاك و نتعرف عليك، ميسالش ماو؟
– avec plaisir ❤️..
و مشات الأمور كيكا.. و تفاهمنا نخرجوا..
و effectivement تلاقينا و خرجنا مشينا عالبحر اول مرة حسيت روحي عايش La vie en rose اللي عييت نقرا عليها في الكتب.. هي تتمشى بجمبي و تحكي و انا نغزرلها و في قلبي من داخل نحمد في ربي اللي جاء نهار و انا و اياها وحدنا قاعدين و نحكيو..
-تسمع فيا؟
– اي بالطبيعة كان ما نسمعكش انت شكون شنسمع 🤷‍♂️
-ههه مالا فاش تخمم؟
-ااا نعرش كيفاش نقولهاك..
-قولها كيما هي.. 🤷‍♀️
-نحبك!!
-كيفاش ؟
-نحبك و مش ماليوم من بكري والله
( hedhi Kent awel déclaration d’amour na3mlhelha f hyety hh o lekhra zeda♥️)
و هنا كنت نستنا في الرفض و ما راعني الا انها تبسمت و قاتلي :
-حتى انت تعجبني
Whnee berasmi dkhalet f mar7alet “le bonheur”
من هاكا النهار تبدلت برشا حاجات
Plutôt كل شيء تبدل
و بدات قصة الحب اللي حلمت بيها من اول نهار
ولينا نمشيو و نجيو مبعضنا
نروحوا لولايتنا مبعضنا
عرفنا كل شيء على بعضنا و حبنا كل يوم يزيد، يزيد، نجحنا مع بعضنا العام بالعام لين ولات هي و النفس واحد ♥️
كملنا القراية و روحنا
انا ديراكت شديت خدمة
و هي زادت بريود و كيف كيف قات خدمة
كبرنا و كبرت احلامنا و وصلنا عملنا خطبة (اي والله خطبتها وقتها فرحتي ما نعطيها لحد.. ♥️)
تعدات الايام لف لف.. و بدينا نبنيوا في دارنا كل شيء كان ماشي parfait الدار كملت (والدينا عاونونا بارشا surtt امها و بوها هي يرحم والدين والديهم)
فكسينا دات العرس في الصيف
(بالضبط 18 اوت)
اما كل شيء كان ماشي باهي عاللخر.. اكلي عاللخر عاللخر..
لين تبدا من داخل تحس اللي فما حاجة cvp
ههه لخي لها الدرجة مسهلة؟
ههههه قلت الحمدلله و تعديت ما خممتش برشا..
كهو تعدات الايامات لف لف
و جاء الشهر الموعود
كنت طاير، ماني مستني شيء من هالدنيا كان كالنهار و اكا المرا ♥️
بالضبط نهار 12 اوت ايجيني تاليفون ل 10 متع الصباح
-الو **** تسمع فيا؟ انا **** بنت خالت (X) احنا في السبيطار
خرجنا الصباح عنا قضيات نكملوا فيهم لخي عملنا اكسيدون ايجا فيسع لسبيطار *****..
و يطيح التليفون من يدي.. منجمتش نسمع بقية الحديث نحس في الدنيا ظلامت في عينيا.. و دارت بيا..
منعرش كيفاش خطفت مفاتح الكهربة و خرجت نجري.. ركبت… سقت.. جريت اكثر ما أنجم رغملي فما حاجة من داخل تقلي زايد فات الفوت.. 💔
زدت قويت جريت عيطت بكيت..
و وصلت.. و يا ريتني ما وصلت
دخلت قيت امها و بوها في القاع يبكيو.. بنت خالتها دايخا.. قاعدة على كرسي دموعها هابطة و هي ساكتة
اختها، خالاتها و خوالها كلهم فم اللي يبكي و اللي يندب
اما انا قلت لا لا خايفين و برا
مشيت لبنت خالتها شديتها من يدها و قتلها قوم هزني لمرتي يعيشك
ما ريتها كان اطرشقت بالبكاء و ولات تبكي بالصوت.. و انا مبهم نغزر و مش مستوعب نغزر و برا
انا كيكا و ايجيني واحد يقربلها (صدقوني لتو لا نعرف شكونوا خاطر مش في مخي اللحظة هاكي..)
-نسمع كان البركة فيك، حبها ربي و هزها عندوا وسع بالك..
لحظتها طحت ما في عيني بلة.. دخت فقت كان بعد 6 سوايع ( و ليلتها ما عاودتش رقدت هه هاكي كانت ثاني nuit blanche في حياتي ، اما سبحانوا شو الفرق بين الليلة لولة و الليلة الثانية)
Bon الطبة قالوا فقت اما انا لليوم نحس في روحي ما فقتش..
قالوا لاباس، اما انا مانيش حاسس روحي لاباس
امي قاتلي تو تنسى اما انا اليوم و بعد قريب 10 سنين ما نسيتش
لتو كي ندخل لداري ( اللي هي normalement دارنا..) نتخيلها قاعدة في الصالة تستنى فيا
نتكى نتخيلها حذايا، نسكر عينايا و نحلهم على تصويرتها..
وين ما يهفت الحس نسمع صوتها.. منعرش منين و كيفاش
اما انا تأكدت من انوا
#الوقت_ما_يداويش هه انا شخصيا ما داوانيش 🙃
شمسي ماللي غابت ما طلعت و الدنيا لكل ظلمة.. 💔
لذا نصيحة من خوكم استحفظوا على اللي تحبوه راهو الدنيا غدارة و الندم بعد الموت عدم.. 💔