حتى “المصعد” رافض يصعد .. الشاعر لزهر الضاوي

#مصعد_الموت
حتى “المصعد” رافض يصعد..
في بْلادي….” بلاد السقوط”..؟؟!!
اشهد يا “جندوبة”..اشهد..
كيفاش طبيبك يموت..؟؟!!
وإيجا تفرّج..شوف المشهد..
ولّا زايد…..فات الفوت…!!
مغدور..وما لْحَقْ” يشَهّد “..
في حفرة..بين زوز حيوط…!!
على بلادو ..طايح يتنهد..
ع القاعة..يفرفت مخبوط…!!
…على بلادو الْ صارت “دونيّة “..
مع “العصابة الاخوانية”..
وولّت مسهلها “المَنيّة”..
و”الكبّوط” وراء “الكبّوط”..؟؟!!
” بدرة”….يا “عز الأولاد.”..!!
ياللي “حسدوك الحساد”..!!
بلادك هرْدوها الفِسّاد..
ويلْعب فيها “الأخطبوط”…!!
..يا خسارةْ زينك وشبابك…
والليعة في قلوب أحبابك…
غدوة.. يديروا ليك “دْرابك”..!!
فيها السافل والشخبوط….!!
..ويتلاقوا جميع الأوغاد..
ويزيدوا “المصعد” “للواد”..
و “البالوعة”..وكي المعتاد..
الشباب اللي كلاه الحوت…!!
..وما دام احنا موشي “عباد”…
باش يبقى يمركي “العدّاد” ..
وكيف الهازل كيف الجاد..
أحنا طبّعنا مع الموت…؟؟!!
الكلّة …. طبّعنا مع الموت… ؟؟!!
الفنان و الشاعر لزهر الضاوي – ( قفصة2020/12/04)