علق النائب المجمدة عضويته بمجلس نواب الشعب ياسين العياري على تصريح رئيس الجمهورية قيس سعيد حول الاحتكار والمضاربة وارتفاع الأسعار.
وقال العياري، في تدوينة فيسبوكية نشرها اليوم الخميس 2021، إن الاحتكار الوحيد في تونس هو ”احتكار رئيس الجمهورية للدولة والسلط والدستور وتعيين أناس تدين بالولاء الشخصي في كل مسالك الدولة”.
وكان رئيس الجمهورية قيس سعيد قد أكد، أمس الأربعاء خلال استقباله لوزيرة التجارة وتنمية الصادرات فضيلة الرابحي بن حمزة، على ضرورة التّصدي لكل مظاهر الاحتكار والمضاربة وإيجاد إطار قانوني لمسالك التوزيع، خاصة بعد أن تعمّد البعض، في الفترة الأخيرة، تخزين مواد غذائية وأخرى ذات علاقة بقطاعات البناء والصحة وغيرها من المجالات.
وفيما يلي نص التدوينة:
“تعرفوه هاك الي يعرف درس واحد، مهما يكون الموضوع، يصبو و يخرج؟
نعرف شكون، محضر كان درس “الإحتكار”.
ترتفع أسوام المواد الأولية، في عالم كامل؟ لا لا السياسيين يعملو في الإحتكار!
الحديد عالميا سومو طار؟ إحتكار! الحديد في دبوات سنكشفها في اللحظة الحاسمة!
أسوام النفط عالميا قاعدة تغلى لين بلدان كيف أمريكا و اليابان تلزت تمس مخزونها الإستراتيجي؟ إحتكار!
أسوام القمح غلات عالميا، خاطر صابة كندا و أكرانيا موش هوما؟ لا لا ما تحكيلي حتى شي، نفهم كان الإحتكار و مسالك التجويع و التفليع و الترييع و التنويع!
باهي، هاو الدواء ما ثماش، تجيب فيه كان الصيدلية المركزية، بالك خاطر البلاد فالسة و الصيدلية ما خلصتش ديونها فما عادش المخابر تزود فيها؟ لا لا! موش هكة! تلقاه إحتكار و مسالك ندرى شنية ودبوات عند سياسيين، هاذوكم الي خذاو 500 مليون دولار و سنكشفهم عندما تأتي اللحظة.
باهي، وسع بالك، هاك شفت البطاطا بالتفرفيش و التفرفيط متاعك، زادت غلات جدا، راهو موش هكة الإقتصاد!
خونة، مأجورين، حشرات، مؤامرات، من أنتم من انتم..
الإحتكار الوحيد هو إحتكارك للدولة و السلط و الدستور و حطان ناس تدين بالولاء الشخصي في كل مسالك الدولة، و إش عملت بيه الإحتكار هذا؟
حتى شي! عزلة دولية على عماء إقتصادي على صمم سياسي على بكم حكومي على شلل في كل شيء!
لا، الغلطة ليست غلطة الإحتكار، الغلطة الي يحكم في كل شيء، واحد ماهوش فاهم حتى شنوة الإحتكار!
حطان راسك في الرمل، دخولك في هستيريا و إتهام الإنس و الجن و الأوس و الخزرج، لن يحل مشكلة واحدة لهذا البلد!
ما تزيد علي سبقوك شيء، كيفك كيفهم، كان الحديث و الفشل و إتهام غيرك بما فيك، لإخفاء على من مزال ما فاقش، إنه البلاد تنهار على كل المستويات و إنت ما فاهم شي…حافظ كان درس الإحتكار!”